വാര്‍ത്തകള്‍ പൈങ്കിളി ആകുമ്പോള്‍...

കൈപ്പള്ളിയുടെ ബ്ലോഗില്‍ പത്രങ്ങള്‍ക്ക് പിഴക്കുമ്പോള്‍ എന്ന പോസ്റ്റില്‍ ഞാന്‍  ഇന്ന് താഴെ കാണും വിധം ഒരു കമന്റ് എഴുതി:

“പത്രങ്ങള്‍ പൈങ്കിളി വാര്‍ത്തകള്‍ സൃഷ്ടിക്കുകയോ അല്ലെങ്കില്‍ വാര്‍ത്തകള്‍ പൈങ്കിളി ആക്കുകയോ ചെയ്യുന്ന ഇക്കാലത്ത് ഓണ്‍‌ലൈന്‍ മാധ്യമങ്ങള്‍ക്ക് വാര്‍ത്തകളെ വസ്തുതാധിഷ്ഠിതമാക്കാനും അത് വഴി അച്ചടി-ദൃശ്യമാധ്യമങ്ങളെ ശരിയായ ദിശയിലേക്ക് നയിക്കാനും കഴിയും. ബ്ലോഗിന്റെ പുതിയ സാധ്യതകളിലേക്കാണ് “നമ്മുടെ ബൂലോകം” വിരല്‍ ചൂണ്ടുന്നത്. അത് വ്യക്തമാക്കുകയാണ് കൈപ്പള്ളിയുടെ ഈ പോസ്റ്റിന്റെ ഉദ്ദേശ്യം എന്ന് മനസ്സിലാവുന്നു. സിയാബ് പ്രശ്നം ഇവിടെ ഒരു നിമിത്തം മാത്രം.”

സിയാബ് എന്ന ചെറുപ്പക്കാരന്‍ ഇല്ലാത്ത ഐ.എ.എസ്സ്. തനിക്കുണ്ടെന്നും ആരോടോ ചാറ്റില്‍ പരിചയപ്പെട്ട് തനിക്ക്  ഇല്ലാത്ത അസുഖം ഉണ്ടെന്ന് ധരിപ്പിച്ച്  ചികിത്സക്കായി കാശ് വാങ്ങിയെന്നും ഉള്ള ആരോപണമാണ് "നമ്മുടെ ബൂലോഗം” എന്ന ബ്ലോഗ് പത്രം അന്വേഷിച്ച്  സത്യാവസ്ഥ പുറത്ത് കൊണ്ടുവന്നത്.  താരതമ്യേന നിസ്സാരമായ ആരോപണമാണ് സിയാബിന്റെ മേല്‍ പതിച്ചിട്ടുള്ളത്.  സിയാബിന്  തന്റെ തെറ്റ് തിരുത്താനും  സാധാരണജീവിതം നയിച്ചു  വിജയത്തിന്റെ പടവുകള്‍ കയറാനും അവസരമുണ്ട്. എന്നാല്‍ നെയ്ത്ത് പണി എടുക്കുന്ന സന്തോഷ് മാധവന്റെ കാര്യമോ?  കൂടുതല്‍ തെറ്റിലേക്ക് പോകാതെ  സാമൂഹ്യജീവിതത്തിന്റെ പൊതുധാരയില്‍ തിരിച്ചു വരാന്‍ സിയാബിന് സഹായം ചെയ്യുകയാണ് യഥാര്‍ഥത്തില്‍ “ നമ്മുടെ ബൂലോഗം“ ചെയ്തത്. എന്നാല്‍ മറ്റ് പരമ്പരാഗത മാധ്യമങ്ങള്‍ സിയാബിനെ വ്യാജ ഐ.എ.എസ്സുകാരനാക്കാന്‍ ഉത്സാഹിക്കുകയായിരുന്നു.. സന്തോഷ് മാധവന്മാരെ ജയിലിലേക്കയക്കാനും ദിവ്യാജോഷിമാരെ ആത്മഹത്യയിലേക്കും നയിക്കാന്‍ കാരണമാകുന്നത് ഇന്നത്തെ മാധ്യമങ്ങളുടെ വകതിരിവില്ലാത്ത വാര്‍ത്തോല്പാദന സമ്പ്രദായമാണെന്ന് പറയാതിരിക്കാന്‍ കഴിയില്ല.  ദിവ്യാജോഷിയെ പറ്റി ദൂരദര്‍ശന്‍ പറഞ്ഞിരുന്നത് കേള്‍ക്കുക! 


മാധ്യമധര്‍മ്മത്തെ പറ്റി ഇനി വിലപിച്ചിട്ട് കാര്യമില്ല.  നാടും നാട്ടിന്റെ സംസ്കാരവും അങ്ങേയറ്റം ദുഷിപ്പിക്കാന്‍ സര്‍വ്വരും ഇന്ന് മത്സരിക്കുകയാണല്ലൊ. രാഷ്ട്രീയം തന്നെ ജീര്‍ണ്ണിച്ച്  ഇന്ന് എവിടെയെത്തി?  പിന്നെ മാധ്യമക്കാരെ കുറ്റം പറയുന്നതെങ്ങനെ?  ചാനലുകളിലും പത്രങ്ങളിലും  എന്തെല്ലാം തട്ടിപ്പ് ഉല്പന്നങ്ങളുടെ പരസ്യങ്ങളാണ് വരുന്നത്.  പരസ്യക്കൂലി കിട്ടണം എന്നേയുള്ളൂ. ഉപഭോക്താവ് വഞ്ചിക്കപ്പെട്ടാലെന്ത്?