ശിഥില ചിന്തകള് എന്ന എന്റെ ബ്ലോഗില് എഴുതിയ കമന്റ് :
രാധേയാ , നമ്മുടെ ശരീരം എന്താണ് , അത് എങ്ങിനെ പ്രവര്ത്തിക്കുന്നു , അതിനെന്തെല്ലാം വൈകല്യങ്ങള് വരാം , അത് എങ്ങിനെയെല്ലാം പരിഹരിക്കാം എന്നൊക്കെ തല നാരിഴ കീറി പരിശോധിക്കുന്ന ഒരു ബൃഹത്തായ ശാസ്ത്ര ശാഖയാണ് ആധുനിക മെഡിക്കല് സയന്സ് . അത് സാര്വ്വലൌകികമാണ് . ലോകത്തെവിടെയും ഒരേ രീതി . ലൂയി പാശ്ചര് സൂക്ഷ്മാണു (മൈക്രോബ്)കണ്ടുപിടിച്ചതിന് ശേഷമാണ് വാസ്തവത്തില് ആധുനിക വൈദ്യശാസ്ത്രത്തിന് ഒരു ദിശാ ബോധം കൈവന്നതും ഒരു ശാസ്ത്രശാഖയായി വളര്ന്നതും . ആധുനിക വൈദ്യശാസ്ത്രത്തിന് മാത്രമാണ് ഒരു മെഡിക്കല് എത്തിക്സ് ഉള്ളതും . മറ്റുള്ള ശാസ്ത്ര ശാഖയോടോപ്പമാണ് ആധുനിക വൈദ്യശാസ്ത്ര ശാഖയും വളരുന്നത് . മറ്റൊരു ചികിത്സാ രീതിക്കും അനുമാനങ്ങളുടെയും ഊഹങ്ങളുടെയും പിന് ബലമല്ലാതെ പരീക്ഷണ നിരീക്ഷണങ്ങളുടെ മാര്ഗ്ഗമില്ല . അതെങ്ങിനെ കഴിയും ?
ഉദാഹരണത്തിന് ആയുര്വ്വേദത്തില് ശരീരം പഞ്ചഭൂതനിര്മ്മിതവും രോഗം ത്രിദോഷങ്ങളാല് സംഭവിക്കുന്നതുമാണ് . ആ കണ്സെപ്റ്റ് മാറ്റി നിര്ത്തിയാല് പിന്നെ ആയുര്വ്വേദമില്ല . ഇനി ആ കണ്സെപ്റ്റ് വെച്ചാണെങ്കില് ഗവേഷണം എങ്ങിനെ നടത്തും . മോഡേണ് മെഡിസനില് ഒരു ബാക്റ്റീരിയ ശരീരത്തില് പ്രവേശിച്ചിട്ടുണ്ടോ എന്ന് കണ്ടെത്താന് മാര്ഗ്ഗമുണ്ട് . ഉണ്ടെങ്കില് ആ ബാക്റ്റീരിയയുടെ കോശഭിത്തി തുളച്ച് കടന്ന് അതിനെ നശിപ്പിക്കാനുള്ള മെഡിസിനും ഉണ്ട് . ആ മെഡിസിന് ഒരാള് ഉണ്ടാക്കുന്നതല്ല . ലോകത്തെങ്ങുമുള്ള ശാസ്ത്ര സമൂഹം അംഗീകാരം നല്കിയാലേ അത് മെഡിസിനാവൂ .
എന്ത് ? എന്തുകൊണ്ട് ? എന്ന ചോദ്യങ്ങള്ക്ക് ഉത്തരം കണ്ടെത്തുന്നേടത്ത് നിന്നാണ് ശാസ്ത്രം ആരംഭിക്കുന്നത് . ആധുനീക വൈദ്യശാസ്ത്രവും ആരംഭിക്കുന്നത് അങ്ങിനെയാണ് . പണ്ടുകാലത്ത് കുറെ സസ്യങ്ങളുടെ വേരുകളും , തോലും , ഇലകളും, കിഴങ്ങുകളുമൊക്കെ കാച്ചിക്കുറുക്കി കഷായം വെച്ചു കുടിക്കാന് വൈദ്യന് നിര്ദ്ധേശിച്ചു . ചിലര്ക്ക് രോഗം മാറി , പലര്ക്കും മാറിയില്ല . അതിനപ്പുറം ക്ലിനിക്കല് ട്രയല് എന്ന ഒരു സംഭവം അന്ന് സാദ്ധ്യമാവുകയില്ലായിരുന്നു . അങ്ങിനെ സാദ്ധ്യമാവുമായിരുന്നെങ്കില് ലൂയി പാശ്ച്ചറിനും , അലക്സാണ്ടര് ഫ്ലെമിംഗിനും അങ്ങിനെ അനേകം ആധുനീക വൈദ്യ ശാസ്ത്രജ്ഞന്മാര്ക്കും ഒരു പണിയും ഉണ്ടാകുമായിരുന്നില്ല .
ഹോമിയോ തീയറിയാണെങ്കില് അത് തികച്ചും ആധുനീകം എന്ന് പറയാവുന്ന ഒന്നാണ് . എന്നാല് നമ്മുടെ ആധുനീക വൈദ്യശാസ്ത്രത്തിന് നേര് വിപരീതമായ ഒരു കണ്സെപ്റ്റ് . അതാണ് അതിന് ഹോമിയോപ്പതി എന്ന് സാമുവല് ഹാണിമാന് നാമകരണം ചെയ്തത് . അത് കൊണ്ടാണ് സൂരജ് പറഞ്ഞത് ഹോമിയോപ്പതി ശരിയാണെങ്കില് മോഡേണ് മെഡിസിന് പൂര്ണ്ണമായും തെറ്റാണെന്ന് പറയേണ്ടിവരുമെന്ന് . പറഞ്ഞത് മനസ്സിലാവുന്നുണ്ടോ ? ഹോമിയോപ്പതി ശരിയാണെന്നും അതൊരു ചികിത്സാമാര്ഗ്ഗമാണെന്ന് സമ്മതിക്കുകയുമാണെങ്കില് ആധുനീക വൈദ്യശാസ്ത്രം കണ്ടെത്തിയ മുഴുവന് മരുന്നുകളും , ഉപകരണങ്ങളും , പ്രതിരോധകുത്തിവെപ്പുകള് പോലുള്ള സങ്കേതങ്ങളും അനാവശ്യമാണെന്ന് പറയേണ്ടി വരും . പറയാമോ ?
രണ്ടും കൂടി സമന്വയിപ്പിച്ചു കൂടേ എന്നാണ് ചോദ്യമെങ്കില് ആദ്യം ഹോമിയോപ്പതി തീയറി പോയി പഠിക്കൂ എന്നാണ് എനിക്ക് പറയാനുള്ളത് . ഞാന് അതിന്റെ കിത്താബുകള് വായിച്ചിട്ടുണ്ട് . ഇവിടെ എല്ലാ കാര്യത്തിലും ഒരു ശാസ്ത്രീയ വീക്ഷണത്തിന്റെ അഭാവമാണ് പ്രശ്നം രാധേയാ ... മനുഷ്യന് തുടര്ന്നും പഠിക്കാമായിരുന്നു , അറിവുകള് നേടാമായിരുന്നു . ഇന്ന് ഈ ഇന്റര്നെറ്റിന്റെ യുഗത്തില് പഠിക്കാന് അനന്ത സാധ്യതകള് കൈവന്നിരിക്കുന്നു . പക്ഷെ ഒന്ന് വേണമായിരുന്നു , ക്യൂരിയോസിറ്റി എന്ന ഗുണം . വിശ്വാസങ്ങളാല് വന്ധ്യംകരിക്കപ്പെടുകയാണ് ഇവിടെ മനുഷ്യമനസ്സുകള് .
മോഡേണ് മെഡിസിന് ഇന്ന് വ്യാപകമായി ദുരുപയോഗപ്പെടുത്തുന്നു . അതും സൂരജ് സൂചിപ്പിച്ചിട്ടുണ്ട് . ഇന്ന് ആസ്പത്രികളില് എത്തുന്ന 90% പേര്ക്കും യഥാര്ത്ഥത്തില് മരുന്ന് ആവശ്യമില്ലായിരുന്നു . wait and watch എന്ന സമീപനം സ്വീകരിച്ചിരുന്നുവെങ്കില് . ഈ 90 ശതമാനമാണ് ആരോഗ്യരംഗത്തെ ഒരു ബിഗ് ബിസിനസ്സാക്കി മാറ്റിയത് . അത് മോഡേണ് മെഡിസിന് എന്ന അനന്യമായ ശാസ്ത്രശാഖയുടെ കുറ്റമല്ല . ജനങ്ങളില് രോഗങ്ങളെക്കുറിച്ചും മരുന്നുകളെക്കുറിച്ചുമുള്ള അജ്ഞതയാണ് അതിന് കാരണം . ആന്റിബയോറ്റിക്കുകളുടെ വിവേചനരഹിതവും അനാവശ്യവുമായ ഉപഭോഗം നിമിത്തം മരുന്നുകളോടുള്ള പ്രതിരോധം ആര്ജ്ജിച്ച പുത്തന് തലമുറ ബാക്റ്റീരിയകള് പെരുകി . ഇതിനുത്തരവാദികള് ജനങ്ങളാണ് ,ആധുനീക വൈദ്യശാസ്ത്രമല്ല . ഇതിനെതിരെ പുതിയ ഔഷധങ്ങള് കണ്ടെത്തേണ്ട ബാദ്ധ്യതയും ആധുനിക വൈദ്യശാസ്ത്രജ്ഞരുടെ തലയിലാണ് . ലോകത്തെങ്ങുമുള്ള ശാസ്ത്രജ്ഞര് അത് തുടരുന്നുമുണ്ട് .
ആധുനീക വൈദ്യശാസ്ത്രത്തിനില്ലാത്ത എന്ത് മേന്മയാണ് ആയുര്വ്വേദത്തിനുണ്ട് എന്ന് നിങ്ങള് പറയുന്നത് ? മെഡിക്കല് കോളേജ് ഉപേക്ഷിച്ച രോഗങ്ങള് ഞങ്ങള് ചികിത്സിച്ചു മാറ്റി എന്ന് ആയുവ്വേദ,ഹോമിയോ,സിദ്ധ,യൂനാനി,പ്രകൃതി ആദി ലാടവൈദ്യന്മാര് തുടങ്ങി മുരിങ്ങൂര് ധ്യാനകേന്ദ്രക്കാരന് വരെ പറയുന്നുണ്ട് . അതെല്ലാം വിശസിക്കുന്നെങ്കില് വിശ്വസിക്കൂ എന്നേ പറയാന് കഴിയൂ . എന്തും വിശ്വസിക്കാന് എന്തെളുപ്പം ! എന്നാല് എന്തും മനസ്സിലാക്കാന് ഇത്തിരി ബുദ്ധിമുട്ടുണ്ട് . കാരണം അത് അല്പം ബൌദ്ധികമായ പരിശ്രമം ആവശ്യപ്പെടുന്നു . ജനത്തിന് അതിനൊന്നും നേരമില്ല . അത് കൊണ്ടാണ് മോഡേണ് മെഡിസിന് ഡോക്റ്റര്മാര്ക്ക് രോഗികളെ ചൂഷണം ചെയ്യാന് കഴിയുന്നത് . അതൊന്നും മഹത്തായ ആധുനീക വൈദ്യശാസ്ത്രത്തിന്റെ കുറ്റമല്ല .
ഏതെങ്കിലും ഡോക്റ്റര് ആത്മാര്ത്ഥതയുടെ പേരില്, തന്നെ സമീപിക്കുന്ന രോഗിയോട് ഇതിന് മരുന്ന് ഒന്നും ആവശ്യമില്ല എന്നും വെറും റെസ്റ്റും നല്ല ഭക്ഷണവും കുറച്ചധികം വെള്ളം കുടിച്ചാലും മതി എന്ന് പറയുന്നു എന്ന് വെക്കുക . ആ ഡോക്റ്ററെ ഒന്നിനും കൊള്ളാത്തവന് എന്ന് ജനം വിധിയെഴുതും . സാധാരണയായി ശരീരത്തിന് സംഭവിക്കുന്ന ഒട്ടുമുക്കാല് രോഗാവസ്ഥയും ശരീരം തന്നെ സ്വയം മാറ്റിയെടുക്കുമെന്ന സത്യവും ഇതിനോട് കൂട്ടി വായിക്കുക !
No comments:
Post a Comment