2007-11-25

യുക്തിചിന്തയും ദാര്‍ശനികദു:ഖവും

(യുക്തിവാദം ബ്ലോഗില്‍ എഴുതിയ മറ്റൊരു കമന്റ്)

പ്രിയ സലാഹുദ്ധീന്‍ ,

എനിക്ക് ഈ ചര്‍ച്ചയില്‍ സക്രിയമായി ഇടപെടാന്‍ അല്പം പ്രയാസമുണ്ട് . ചിന്തയുടെയും അന്വേഷണങ്ങളുടെയും അവസാനത്തെ വഴിത്തിരിവില്‍ അന്തം വിട്ടിരിക്കുന്നവനാണ് ഞാന്‍ . ഏതൊരു ഭൌതിക വാദിക്കും അങ്ങിനെയേ കഴിയൂ എന്നും ഞാന്‍ സമ്മതിക്കുന്നു . എന്നാല്‍ ദൈവ വിശ്വാസത്തിലേക്ക് തിരിച്ചു പോകാനും കഴിയില്ല . കാരണം ദൈവത്തെ പറ്റി മനുഷ്യര്‍ തന്നെയാണ് വിശദീകരിച്ചു തരുന്നത് . ആ വിശദീകരണങ്ങള്‍ അവിശ്വസനീയമാം വിധം ബാലിശങ്ങളാണ് .

മനുഷ്യന്‍ ഭൂമിയില്‍ പരിണമിച്ചുണ്ടാകുന്നതിന് ലക്ഷക്കണക്കിന് വര്‍ഷങ്ങള്‍ക്ക് മുന്‍പേ ഭൂമിയില്‍ ജീവജാലങ്ങളുണ്ട് എന്നത് അസന്നിഗ്ദമായി തെളിയിച്ചിട്ടുണ്ട് . പരിണാമ സിദ്ധാന്തം നിങ്ങള്‍ അംഗീകരിക്കുകയില്ലെങ്കിലും ഭൂമിയെ മനുഷ്യനോടുകൂടി ഇക്കാണുന്ന രൂപത്തില്‍ ദൈവം സൃഷ്ടിച്ചു എന്ന് പറയുകയില്ലല്ലോ ? ഗവേഷണ ഫലങ്ങള്‍ തെളിയിക്കുന്നത് മനുഷ്യന്‍ ഉണ്ടാകുന്നതിന് മുന്‍പേ ഡിനോസറുകള്‍ പോലെയുള്ള ജീവികള്‍ ഭുമിയില്‍ ഉണ്ടായിരുന്നു എന്ന് തന്നെയാണ് . അതിനു മുന്‍പും ഭൂമിയില്‍ ജീവജാലങ്ങളുണ്ട് .

മനുഷ്യന്‍ ഉണ്ടായിട്ടും ലക്ഷക്കണക്കിന് വര്‍ഷങ്ങള്‍ ഭാഷയില്ലാതെയാണ് അവന്‍ ജീവിച്ചത് . ഈ സമയമൊക്കെ ദൈവം ഇല്ല . സംസാര ഭാഷ തന്നെ ഇന്ന് കാണുന്ന രൂപത്തില്‍ വാമൊഴിയും വരമൊഴിയുമായി വളര്‍ന്നതും വ്യാകരണ നിബദ്ധമായതുമൊക്കെ ഒരു പതിനായിരം വര്‍ഷങ്ങള്‍ക്കിപ്പുറത്താണ് . അതിന് ശേഷമാണ് ദൈവങ്ങളുടെ വരവ് . ദൈവം ഭൂമിയെയും മനുഷ്യനെയും മറ്റും സൃഷ്ടിച്ചു എന്ന് പറയുമ്പോള്‍ എങ്ങിനെ ഏത് രൂപത്തില്‍ എപ്പോള്‍ സൃഷ്ടിച്ചു എന്നും മറ്റുമുള്ള ചോദ്യങ്ങള്‍ സ്വാഭാവികമായും ഉയരും .

അപ്പോള്‍ സലാഹുദ്ധീനെപ്പോലെയുള്ളവര്‍ ഖുര്‍‌ആനിനെ അഭയം പ്രാപിക്കും, കൃസ്ത്യാനികള്‍ ബൈബിളിനെ അഭയം പ്രാപിക്കും , ഹിന്ദുക്കള്‍ വേദങ്ങളെയും ഉപനിഷത്തുക്കളെയും അഭയം പ്രാപിക്കും . എന്നാല്‍ ഒരു ഇസ്ലാമിന് ഉപനിഷത്തുകളെയും ബൈബിളിനെയും അഭയം പ്രാപിക്കാന്‍ കഴിയാത്ത പോലെ , ഒരു ഹിന്ദുവിന് ഖുര്‍‌ആനെയും ബൈബിളിനെയും അഭയം പ്രാപിക്കാന്‍ കഴിയാത്ത പോലെ , ഒരു കൃസ്ത്യാനിക്ക് ഖുര്‍‌ആനെയും ഉപനിഷത്തുക്കളെയും അഭയം പ്രാപിക്കാന്‍ കഴിയാത്ത പോലെ യുക്തിസഹമായി ചിന്തിക്കുന്ന ഒരാള്‍ക്ക് ഈ ഗ്രന്ഥങ്ങളെ ഒന്നിനെയും അഭയം പ്രാപിക്കാന്‍ കഴിയില്ല .

മനുഷ്യന്‍ ഇല്ലാത്ത ആ കാലഘട്ടങ്ങളില്‍ ദൈവം എന്ത് ചെയ്യുകയായിരുന്നു എന്ന ചോദ്യം സ്വാഭാവികമായും ഉയരും . അതാണ് ഞാന്‍ പറയുന്നത് ദൈവം ഉണ്ട് എന്ന് പറയുന്നവരുടെ വാദഗതികള്‍ അതാത് ഗ്രന്ഥങ്ങളില്‍ അഭയം കണ്ടെത്തുന്നവര്‍ക്ക് മാത്രമേ ഉള്‍ക്കൊള്ളാന്‍ കഴിയൂ . അതിനപ്പുറത്തേക്ക് ചോദ്യങ്ങളുമായി സഞ്ചരിക്കുന്ന ഒരു യുക്തിവാദി മനസ്സിന്റെയുള്ളില്‍ ഒരു ദാര്‍ശനിക വ്യഥ അനുഭവിക്കുന്നുണ്ട് . ആ ദാര്‍ശനിക വ്യഥ എല്ലാവരുടേയും പൊതുവായ ഒരു ദു:ഖം തന്നെയാണ് .

എന്നാല്‍ ഒരു വിശ്വാസി അവന്റെ വിശ്വാസത്തില്‍ അഭയം കണ്ടെത്തുന്നത് കൊണ്ട് ആ ദു:ഖം അനുഭവിക്കേണ്ടി വരുന്നില്ല എന്ന് മാത്രം . എന്നാല്‍ ജീവിതത്തിന്റെ സുഖം , മറ്റ് സങ്കടങ്ങള്‍ എല്ലാം തന്നെ എല്ലാവരും ഒരേപോലെയാണ് അനുഭവിക്കുന്നത് . അത് കൊണ്ട് എന്നോട് ചോദിച്ചാല്‍ ഒരു വിശ്വാസി എത് വിശ്വാസത്തിലാണോ അഭയം കണ്ടെത്തുന്നത് ആ വിശ്വാസം കണ്ടെത്തട്ടേ എന്ന് പറയും . എന്നാല്‍ അതുമായി ബന്ധപ്പെട്ട് ഒരു പാട് മനുഷ്യ വിരുദ്ധമായ കാര്യങ്ങള്‍ അരങ്ങേറുന്നുണ്ടല്ലോ ?

ഇവിടെത്തന്നെ ഉപ്പായിമാപ്ല പറഞ്ഞത് ശ്രദ്ധിക്കുക . ചേകന്നൂര്‍ മൌലവി ഉന്നയിച്ച കാര്യങ്ങള്‍ പരിഗണിക്കേണ്ടതല്ലേ . അപ്പോള്‍ നമ്മള്‍ വീണ്ടും മതത്തിലെത്തും , അവിടെ നിന്ന് ദൈവത്തിലേക്കെത്തും . ചര്‍ച്ച നീളും .ജബ്ബാര്‍ മാഷ് ഖുര്‍‌ആനെ വിമര്‍ശിക്കുന്നത് അദ്ദേഹം ഇസ്ലാം കുടുംബത്തില്‍ ജനിച്ചു പോയതിനാലാണ് . കൃസ്ത്യന്‍ കുടുംബത്തില്‍ ജനിച്ച എത്രയോ പേര്‍ ബൈബിളിനെ വിമര്‍ശിക്കുന്നുണ്ട് . ഹിന്ദു മത ഗ്രന്ഥങ്ങളെ ഹിന്ദു കുടുംബങ്ങളില്‍ ജനിച്ചവരും വിമര്‍ശിക്കുന്നു . കാരണം എല്ലാ ഗ്രന്ഥങ്ങളിലും പരസ്പരവിരുദ്ധവും അവിശ്വസനീയവുമായതും ബാലിശങ്ങളുമായ വിവരങ്ങളുമാണ് ചിന്തിക്കുന്നവര്‍ കാണാന്‍ കഴിയുന്നത് . വിശ്വാസം മാറ്റി വെച്ച് വായിച്ചാല്‍ ഗ്രന്ഥങ്ങള്‍ വെറും അസത്യപ്രസ്ഥാവനകള്‍ ആണെന്ന് കാണാന്‍ കഴിയും . സലാഹുദ്ധീന്‍ രാമായണം വായിച്ചു നോക്കൂ , അപ്പോള്‍ മനസ്സിലാവും . പത്ത് തലയുള്ള രാവണനും മറ്റും .

മൊത്തത്തില്‍ കള്ളത്തരങ്ങളുടെ ഒരു മഹാ കലവറ ആയിട്ടാണ് എല്ലാ വിശ്വാസങ്ങളെയും വിശ്വാസിയല്ലാത്ത ഒരാള്‍ക്ക് കാണാന്‍ കഴിയുക . പിന്നെ നമ്മള്‍ ചര്‍ച്ച ചെയ്തത് കൊണ്ട് എന്ത് ഫലം ? ഇല്ല സലാഹുദ്ധീന്‍ വിശാസത്തിലൂടെ പോയാല്‍ സത്യത്തില്‍ എത്തുകയില്ല . യുക്തി ചിന്തയിലൂടെ പോയാലും അന്തിമ സത്യത്തില്‍ എത്തുകയില്ല . എന്നാല്‍ നമുക്ക് യോജിക്കാന്‍ പറ്റുന്ന ഒരു പോയിന്റ് ഉണ്ടായിരുന്നു , സ്കെപ്റ്റിസം . നമുക്ക് ഒന്നുമറിയില്ല എന്ന പോയിന്റ് . അവിടെയും നമുക്ക് സന്ധിക്കാന്‍ കഴിയില്ല . കാരണം സലാഹുദ്ധീന്‍ വിശ്വാസം ഒഴിവാക്കുകയില്ല , ഞാനാണെങ്കില്‍ പരിമിതമാണെങ്കിലും സയന്‍സ് ആണ് അല്പമെങ്കിലും സത്യം അനാവരണം ചെയ്തിരിക്കുന്നത് എന്ന ധാരണ മാറ്റുകയുമില്ല .

പിന്നെ ഉപ്പായി മാപ്ല പറഞ്ഞ പോലെ യോജിക്കാന്‍ പറ്റുന്ന ഒരു വേദിയുണ്ട് . അതിന് സലാഹുദ്ധീന്‍ തയ്യാറുണ്ടോ ? ദൈവത്തിന്റെ അസ്തിത്വത്തെക്കുറിച്ചുള്ള തര്‍ക്കം മാറ്റിവെക്കാം . സമൂഹത്തിലുള്ള അന്ധവിശ്വാസങ്ങള്‍ക്കും അനാചാരങ്ങള്‍ക്കുമെതിരെ യോജിച്ച് ശബ്ദമുയര്‍ത്തുക . അന്ധവിശ്വാസങ്ങളില്‍ നിന്നും അനാചാരങ്ങളില്‍ നിന്നും ദൈവത്തെ മാറ്റി നിര്‍ത്തുക . മത പരവും ആചാരപരവുമായ ചൂഷണങ്ങള്‍ക്കെതിരെ , തമിഴ് പുലികളുടേതുള്‍പ്പെടെയുള്ള തീവ്രവാദങ്ങള്‍ക്കെതിരെ ശബ്ദമുയര്‍ത്തുക. സാര്‍വ്വലൌകികമായ മാനവികതക്ക് വേണ്ടി ശബ്ദമുയര്‍ത്തുക. എന്തെല്ലാം തിന്മകള്‍ ഈ ഭൂമുഖത്ത് നിന്ന് തുടച്ച് നീക്കപ്പെടേണ്ടതുണ്ട് . ഇസ്ലാം മതത്തില്‍ മാത്രമല്ല എല്ലാ മതത്തിലും ഇങ്ങിനെ തിന്മകളുണ്ട് . മാത്രമല്ല നമ്മെയെല്ലാം നേരിട്ട് സ്വാധീനിക്കുന്ന രാഷ്ട്രീയത്തില്‍ ഇന്ന് ഏറ്റവും തിന്മ നിറഞ്ഞതാണ് . നമ്മുടെയെല്ലാം നികുതിപ്പണമാണ് സര്‍ക്കാരിന്റെ റവന്യൂ വരുമാനം . അത് തോന്നിയ പോലെ കൈകാര്യം ചെയ്യുന്നു . ഇതൊക്കെയാണ് സക്രിയമായ ചര്‍ച്ചകള്‍ എന്ന് തോന്നുന്നു .

ഞാന്‍ പറഞ്ഞല്ലോ നസ്തികവും ആസ്തികവുമായ വിചാരധാരകള്‍ സമാന്തരമായി എല്ലാ കാലങ്ങളിലും തുടര്‍ന്നിട്ടുണ്ട് . ഇനിയും തുടരും , എന്നാല്‍ എവിടെയുമെത്തുകയുമില്ല .ഞാന്‍ വീണ്ടും വരാം .

1 comment:

മുക്കുവന്‍ said...

എന്നാല്‍ ഒരു ഇസ്ലാമിന് ഉപനിഷത്തുകളെയും ബൈബിളിനെയും അഭയം പ്രാപിക്കാന്‍ കഴിയാത്ത പോലെ , ഒരു ഹിന്ദുവിന് ഖുര്‍‌ആനെയും ബൈബിളിനെയും അഭയം പ്രാപിക്കാന്‍ കഴിയാത്ത പോലെ , ഒരു കൃസ്ത്യാനിക്ക് ഖുര്‍‌ആനെയും ഉപനിഷത്തുക്കളെയും അഭയം പ്രാപിക്കാന്‍ കഴിയാത്ത പോലെ യുക്തിസഹമായി ചിന്തിക്കുന്ന ഒരാള്‍ക്ക് ഈ ഗ്രന്ഥങ്ങളെ ഒന്നിനെയും അഭയം പ്രാപിക്കാന്‍ കഴിയില്ല

thats a damn good explanation KP! every books written on earth are by human beings. some people blindly believes that its written by GOD. we cant argue with them.

DNA research shows that cimpanzee and human are got the same sequences. but our believers are not ready to accept the darwins theory yet! yep, just like earth is flat :)