Sebin Abraham Jacob ന്റെ OpenHouse/ഇളം തിണ്ണ എന്ന ബ്ലോഗില്‍ ഇന്ന് എഴുതിയ ഒരു വ്യക്തിഗത കമന്റ് :
ബ്ലോഗില്‍ നാം നമ്മുടെ ജീവിതമല്ല ജീവിക്കുന്നത് എന്ന വെര്‍ച്വാലിറ്റി ആശയം അല്പം പഴയതാണ് സെബിനേ... മലയാളം ബ്ലോഗിന്റെ ആരംഭകാലത്ത് അത് ശരിയായിരിക്കാം. ബൂലോഗം എന്ന ഒരു സാങ്കല്പിക ലോകം മലയാളം ബ്ലോഗ് എഴുത്തുകാരുടെ കൂട്ടായ്മയായി അന്ന് കരുതപ്പെട്ടതും ശരി തന്നെ. എന്നാല്‍ ഇന്ന് സ്ഥിതി അപ്പാടെ മാറി. ഒന്നാമത് ബൂലോഗം എന്ന ആ പഴയ കൂട്ടായ്മ കാലഹരണപ്പെട്ടു കഴിഞ്ഞു. മറ്റൊന്ന് ധാരാളം ഓണ്‍‌ലൈന്‍ പ്രസിദ്ധീകരണങ്ങളും (നാട്ടുപച്ച പോലെയുള്ളത്) "കൂട്ടം" പോലെ സോഷ്യല്‍ ഇന്ററാക്‍ഷന്‍സ് ഗ്രൂപ്പുകളും നിലവില്‍ വന്നുകഴിഞ്ഞു. ഇതൊക്കെ ഇപ്പറഞ്ഞ വെര്‍ച്വല്‍ സ്പേസിന്റെ ഭാഗമോ അതിന്റെ വികാസമോ ആണ്. ബ്ലോഗില്‍ മാത്രം ഒരു വെര്‍ച്വല്‍ ജീവിതം എന്നത് പഴയ ഹാങ്ങോവര്‍ ആണെന്ന് പറയുകയാണ് ഞാന്‍.
ഒരു പക്ഷെ ഇന്ന് മലയാളത്തില്‍ ഏറ്റവും സജീവമായ വെര്‍ച്വല്‍ സ്പേസ് "കൂട്ടം" ആണെന്ന് തോന്നുന്നു. അവിടെ അനോണികള്‍ ആരുമില്ല.
ഞാന്‍ മിക്കവാറും സമയങ്ങളില്‍ ഇപ്പോള്‍ ഓണ്‍‌ലൈനില്‍ തന്നെയാണ്. ആ സമയങ്ങളുടെ ആകെത്തുകയല്ലെ എന്റെ വെര്‍ച്വല്‍ ജീവിതം. മറ്റുള്ളവര്‍ക്കും അതങ്ങനെയല്ലെ വരൂ. സോഷ്യല്‍ ഇന്ററാക്‍ഷന്റെയും മറ്റ് വെബ് സെര്‍ച്ചിങ്ങിന്റെയും കാര്യത്തിലാണ് പറഞ്ഞത്. ഇതില്‍ നിന്ന് ബ്ലോഗിലെ ഇടപെടലിനെയും വായനയെയും മാത്രം എങ്ങനെ അടര്‍ത്തി മാറ്റാന്‍ ഇന്ന് കഴിയും?
ഒരു ട്രെന്റ് സെറ്റ് ആയാല്‍ അത് പിന്നെ ഓട്ടോമെറ്റിക്ക് ആയി നിലനിന്നു പോകും എന്നാണ് ബ്ലോഗിലെ അനോണിമിറ്റിയെയും ഈ വെര്‍ച്വല്‍ സ്പേസ് എന്ന കണ്‍‌സെപ്‌റ്റിനെയും പറ്റി എനിക്ക് തോന്നിയിട്ടുള്ളത്. ഒരു ഉദാഹരണം പറയാം. ഇന്നും പുതുതായി ബ്ലോഗ് തുടങ്ങുന്ന മിക്കവാറും എല്ലാവരും അനോണി പേരിലാണ് ഐഡി ഉണ്ടാക്കുന്നത്. എന്നാല്‍ അതേ ആള്‍ക്കാര്‍ "കൂട്ട"ത്തില്‍ സ്വന്തം പേരും വിലാസവും എല്ലാം അവിടെ ചേര്‍ക്കുന്നുണ്ട്. മാത്രമല്ല അവിടെ സംവാദങ്ങളും ചര്‍ച്ചകളും സജീവമാണ് താനും,കൂടാതെ പ്രൊഫൈലില്‍ നിന്ന് തന്നെ ചാറ്റിങ്ങും അനുവദനീയമാണ്. അതാണവിടത്തെ ട്രെന്റ്. അത്രയേയുള്ളൂ.
ബ്ലോഗ് ഐഡി ഉണ്ടാക്കിയാല്‍ തങ്ങള്‍ ഒരു പ്രത്യേക ലോകത്ത് എത്തിപ്പെട്ട പോലെ സങ്കല്‍പ്പിക്കപെടുന്നത് ബ്ലോഗിന്റെ അനുക്രമമായ വളര്‍ച്ചയെ മുരടിപ്പിച്ചു കളഞ്ഞു എന്ന് തെറ്റായാലും ശരിയായാലും എനിക്ക് തോന്നിയിട്ടുണ്ട്. ബ്ലോഗ് അക്കാദമിയുടെ തുടക്കക്കാലത്ത് , ബ്ലോഗ് എന്നാല്‍ ഒരു ജനകീയമാധ്യമമാവണം(സിറ്റിസണ്‍ ജേര്‍ണ്ണലിസം) എന്ന ചിന്ത കലശലായി എന്നെ പിടി കൂടിയതായിരുന്നു ആ തോന്നലിന് കാരണം. ഏതായാലും അക്കാദമി അതിന്റെ വഴിക്കും ബൂലോഗം അതിന്റെ വഴിക്കും പോയി എന്ന് ചുരുക്കി പറയാം. വണ്ടിയുടെ പിറകില്‍ കുതിരയെ കെട്ടാനേ നമുക്കറിയൂ എന്ന് തോന്നുന്നു.
No comments:
Post a Comment